Nang-hostage sa anak napusilan

CEBU, Philippines – Usa ka amahan ang napusilan sa kapolisan human mi-hostage sa iyang 3-anyos nga anak sa sulod sa ilang panimalay sa sitio Maarat, barangay Bungtod,  dakbayan sa Bogo gikan sa alas-9 sa buntag hangtud alas-5 kagahapon sa hapon.

Sa gipadalang text message ni Chief Inspector Richard Oliver, hepe sa kapolisan sa maong dakbayan ngadto sa mga sakop sa media ang suspek gituohang ubos sa impluwensya sa ilegal nga drugas.

Sumala pa nga armado kini og sundang ug kutsilyo dihang iyang gi-hostage ang anak.

Ang mga sakop sa kapolisan lakip ang Bogo Special Weapons and Tactics miresponde sa dapit diin adunay gihimong negosasyon sud sa pipila ka oras aron makombinsir ang suspek nga motahan.

Apan pag-abot sa alas-4:45 sa hapon kagahapon, gikatahong nahimong bayolente ang suspek ug mihana na og dunggab sa iyang anak maong napugos ang SWAT pagsud ug napusilan ang suspek sa ubos nga bahin sa iyang tiyan. Ang suspek daling gidala sa Bogo City District Hospital samtang daling naluwas ang anak niini.

Si Roland Tul-id, reporter sa DyCM didto sa Bogo nga nagkober sa maong insidente ug nakahinabi sa Banat News miingon nga base sa mga impormasyong gihatag sa kapuyo sa suspek naburyong kini tungod sa kabalaka nga siya dakpon tungod sa paglugos og duha ka menor de edad. – /EIM) (BANAT NEWS)