Tulo ka JO sa hospitals positibo sa drugas
CEBU, Philippines – Positibo sa ginadili’ng drugas ang tulo ka job order nga kawani sa mga district hospitals sa probinsiya sa gipahigayung drug test kagahapon sa hapon.
Ang hepe sa Cebu Provincial Anti-Drug Abuse Council (CPADAC), Joey Hererra, nibutyag nga duha sa mao’ng JO ang positibo sa paggamit og shabu samtang ang laing usa positibo sa paggamit sa marijuana.
Matud ni Hererra nga ipaubos pa sa confirmatory test ang resulta kagahapon sa drug test ug kung makompirmar nga tiggamitan og ginadili’ng drugas ang mao’ng mga JO, malagpot kini sa ila’ng trabaho.
Matud usab niya nga 57 ka JO sa mga district hospitals ang gipaubos kagahapon sa drug test.
Ang mao’ng mga JO gipatawag kini alang sa ila’ng IQ test ug personal test isip rekisitos sa pag-renew sa ila’ng kontrata.
Human sa examinations, alas 3:00 sa hapon gipaubos dayun sa drug test ang nahisgutang mga JO.
Si Hererra nagkanayun nga padayun ang ila’ng pagpahigayun og drug test sa mga kawani sa gobiyerno sa probinsiya.
Ang kagamhanan sa probinsiya hugtanon sa ila’ng kampaniya batok sa ginadili’ng drugas ug sa implementasyon sa ila’ng programa nga drug-free workplace. – /GMR) (BANAT NEWS)
- Latest
