PNoy giawhag papirmahan na ang 7th district bill
CEBU, Philippines – Giawhag sa hunta probinsiyal si Presidente Benigno Simeon Aquino, III nga pirmahan na ang House Bill No. 4427 nga magmugna sa ika-pito’ng distrito.
Ang HB 4427 napalabang sa Kongreso niadto’ng Mayo 26, 2014 ug niadto’ng Hulyo 28, 2015 sa Senado.
Si Bokal Christopher Baricuatro ang niduso sa resolusyon nga gipasar kagahapon nga nag-awhag sa Presidente.
Kini gumikan kay usa ka buwan na lang sa dili pa mosang-at sa ila’ng Certificate of Candidacy (COC) lakip na niadto’ng mopapili sa ika-pito’ng distrito sama ni Baricuatro.
Ubos sa HB 4427, tulo ka bag-o’ng posisyon ang madugang nga pilion nga mao ang usa ka kongresista ug duha ka sakop sa hunta probinsiyal.
Ang ika-pito’ng distrito langkuban sa lungsod sa Dumanjug, Ronda, Alcantara, Moalboal, Badian, Alegria, Malabuyoc ug Ginatilan.
Si Gobernador Hilario Davide III naglaum nga mapirmahan na niadto’ng Biyernes sa Presidente ang bill.
Si Davide nibutyag nga niadto’ng Huwebes sa pagbisita ni Aquino sa Sugbo, iya’ng nasultihan kabahin sa mao’ng bill ug nipasalig nga iya’ng tan-awon ang mao’ng balaudnon. – /GMR) (BANAT NEWS)
- Latest
