Lolo nag-wild patay

CEBU, Philippines - Usa ka 60 anyos nga lalaking hubog ug gikatahong nag-wild ang namatay human iyang gihapsan iyang ulo og kahoy nga dunay lansang sa sud sa ilang balay sa Cobe Housing, Brgy. Canduman, sa dakbayan sa Mandaue niadtong miaging Miyerkules.

Si Senior Police Officer 2 Tirso Plania, imbestigador sa Presinto 6 sa Mandaue City Police Office (MCPO) miila sa namatay nga mao si Gaudioso Penida Batal.

Matud pa ni Plania namuak sa ilang mga butang si Gaudioso tungod sa kahubog ug wala nipatuo sa pagpakalma sa iyang anak nga si Rodel ug gilabay pa kini og botelya.

Tungod sa kadaghan na sa danyos nga nahimo sa amahan, gikatahong gidala kini ni Rodel sa gawas sa ilang balay apan didto gikatahong nisamot kini pag-wild ug giparokparok iyang ulo sa sementadong bungbong .

Wa pa gyud natagbaw, nipunit kini og kahoy nga may lansang nga maoy gihapakhapak  sa iyang ulo.

Ang mga polis sa  Presinto 6  sa MCPO nga maoy nakatubag sa alarma  ang nakaabot pa sa gihimo niini ug maoy nipakgang kaniya ug gihatod dayon sa North General Hospital apan didto gideklarar sa mga  doktor nga dead on arrival.

Padayon pa karon ang kapolisan sa ilang imbestigasyon kalabot sa maong insidente. (BANAT NEWS)