Rama wa kasulbad sa problema sa 93-1 Lots

CEBU, Philippines - Si kanhi kongresista Tomas Osmeña nagkanayon nga kung siya maoy mahimong mayor sa dakbayan sa Sugbo sulbaron dayon niya ang problema kabahin sa 93-1 nga luna.

Matud niya nga gihatagan ni Rama og kabalaka ang mga residente sa maong lugar tungod kay pulos lang pasalig apan hangtud karon wala pa kini masulbad. Si Osmeña nagkanayon nga nagpadayon ang problema karon sa 93-1 tungod kay si Rama wala mosugot sa land swap deal tali sa probinsiya ug dakbayan sa Sugbo sa milabay’ng pito ka tuig.

“He takes the world revolving around him by presenting a proposal to the province, he presumed the province will accept it because he thinks he owns the province”, ni Osmeña pa.

Ang nahisgutang luna nga nahimutang sa dakbayan sa Sugbo gipanag-iya sa probinsiya ug niining ulahi lang ang kagamhanan sa Sugbo mitanyag og P500 milyones sa probinsiya isip bayad sa luna. Ang probinsiya padayon pang nagtimbang-timbang sa maong tanyag.

Si Osmeña nagkanayon nga ang mga namuyo diha sa nahisgutang luna dugay na kaayong nag-antos sa maong problema ug padayon ang gibati nga kabalaka sa ilang sitwasyon tungod kay wala pa nila maangkon ang luna nga gitukuran sa ilang mga balay.(BANAT NEWS)