Piniriso nga naghikog gamit ang garter sa brief sulod sa police station namatay g’yud
CEBU, Philippines - Namatay g’yud kadtong piniriso nga naghigot og garter sa iyang brief samtang gibilanggo sulod sa Mabolo Police Station sa miaging adlaw.
Bisan gidala pa sa ospital si Pricilo Ijurpe, 35, apan wala na siya maluwas. Taga Sitio Kambitas, Barangay Babag, dakbayan sa Sugbo si Ijurpe ug nag-atubang og kaso nga frustrated murder.
Si PRO-7 director Prudencio “Tom” Bañas miingon nga lisud gayud mabantayan kanunay sa mga polis ang tanang detenido.
Matud ni Bañas nga bisan og walay hinagiban apan kun ang piniriso gusto g’yud nga maghikog mahimong iparok niya ang iyang ulo sa semento.
Si Bañas miingon nga walay sala ang jailer sa maong hitabo.
Gitataw sa kapolisan sa Mabolo nga dili tinuod nga dili na nila pasul-obon og brief ang mga mapriso sa ilang selda.
Ang kadagkoan sa Commission on Human Rights (CHR-7) gusto nga magpakisayod kun tinuod ba nga did-an na nila ang mga binilanggo pagpasul-ob og brief.
Matud ni CHR-7 regional director Arvin Odron nga walay problema kun estriktohon ang mga binilanggo apan dili did-an ang mga piniriso nga mosul-ob og underwear. (BANAT NEWS)
- Latest
