Gikiha na kadtong mipatay tungod lang sa sambag
CEBU, Philippines – Ang piskaliya mipasaka og kaso nga kriminal batok sa 61-anyos nga lumolupyo sa Barangay Guadalupe nga mipatay sa iyang silingan nga gikaaway niya tungod lang g’yud sa sanga sa kahoy’ng sambag.
Si Assistant Cebu City Prosecutor Noel Cellona mipasaka og kaso nga homicide batok ni Alfredo Marikit nga gitumbok nga maoy midunggab ug mipatay ni Josefino Doño kaniadtong Agosto 16.
Ang kapolisan una nga mipasaka og kaso nga murder batok ni Marikit apan si Prosecutor Cellona miingon nga homicide lang ang kaso nga posible’ng nalapas sa akusado.
Sa wala pa mahitabo ang pagpanunggab, si Marikit ug Doño naglalis tungod kay gusto ni Marikit nga ipaputol ang sanga sa sambag nga naglandong sa iyang mga tanom nga buwak.
Matud pa nga si Doño midumili sa awhag kay gianugnan siya nga namuwak na ang mao nga sanga. Si Marikit milakaw apan mibalik nga nagdala na og sundang.
Usa ka saksi misaysay nga midagan siya sa kahadlok apan sa iyang paglingi, nakita niya nga nagkadugo na si Doño. Nadunggan sa saksi ang akusado nga adunay gitawgan sa iyang cellphone ug miingon nga nakadisgrasya siya. – /The Freeman)
- Latest
