Nagbisyong pag-umangkon gipatay sa uyoan

CEBU, Philippines – Nakabsan sa kinabuhi sulod sa Cebu City Medical Center (CCMC) ang usa ka 25-anyos nga lalaki human gipusil sa ulo sa iyang uyoan diha sa Sitio Mansanitas, Brgy. Cogon Pardo kagahapon sa buntag.

Ang biktima mao si Ryan Bolivar, ug ang suspetsado mao si Victor Bascon Bolivar, 47, pulos nagpuyo sa maong dapit.

Sumala pa ni Senior Police Officer 4 Rene Barral ang desk officer sa Pardo Police nga nahinabi sa Banat News napusilan ni Victor si Ryan human sa ilang mainiton nga panaglalis.

Matud pa ang kapuyo ni Ryan nagpatabang sa suspek  kay nagumon sa bisyo sa drugas si Ryan. Apan dihang gimaymayan gikatahong nasuko si Ryan maong  napusilan kini sa uyoan diha sa ulo gamit ang  38 revolver. Namatay sa CCMC si Ryan alas 9:46 sa buntag, samtang nadakpan si Victor. – /EIM) (BANAT NEWS)