Dugang doktor sa Toledo City Health

CEBU, Philippines – Sa dili madugay ang Toledo City Health Department madugangan na og duha ka doktor nga moabag sa gimbuhaton sa tulo karon ka mananambal sa mao nga departamento.

Si City Health Officer Esperanza Canumay dugay na nga miawhag sa kagamhanan sa Toledo nga pun-an ang mga doktor nga nagtrabaho sa iyang departamento aron hingpit sila nga makapangalagad sa katawhan.

Nahibaw-an nga ang duha ka doktor gibansay na sa miaging semana sa ilang trabaho sa City Health Department kun hingpit na sila nga makasugod sa pagserbisyo. Matud ni Canumay nga ang gipaabot na lang mao ang pagpirma ni Toledo City Mayor John “Sonny” Henry Osmeña alang sa pagdawat sa maong mga doktor isip kawani sa dakbayan.

Ang Toledo City Health Department nanginahanglan usab og dugang mga nurse.

Matag adlaw daghang pasyente ang maglinya sa City Health Department aron magpahiling sa kahimtang sa ilang panglawas ug ang uban niini magpabakuna sama sa anti-rabies. – /RUB) (BANAT NEWS)