Drayber nakatulog, van miharos sa mga tawo

CEBU, Philippines - Usa ang patay ug duha ang angol human gipangharos sa usa ka delivery van ang mga tawo daplin sa dalan sa dihang nakatulog ang drayber niini samtang nagdagan diha sa National Highway sa Brgy. Don Antigua sa lungsod sa Borbon sa nakalabay nga buntag.

Ang namatay naila nga si Danilo Ornopia, 39, trabahante sa DPWH 5thEngineering Office nga nagtrabaho daplin sa dalan niadtong tungora samtang naangol  sila si Jonkeith Sepulveda, 14, ug Letecia Tero, 65, pulos nagpuyo sa maong lugar.

Samtang ang drayber sa Isuzu Elf delivery van mao si Michael Cabarrubias, 23, taga Pakigne, lungsod sa Minglanilla ug trabahante sa Plasido Cinco Meat Dealer nga nahimutang sa Salvador Extension, Labangon , Cebu City.

Matud pa ni Senior Police Officer 4 Morie Magdadaro ang officer in-charge sa Borbon Police nga nahinabi sa Banat News, paingon sa dakbayan sa Bogo ang delivery van aron maghatod sa karne sa usa ka mall.

Apan pag-abot niini sa maong lugar nakatulog ang drayber samtang nagmaneho hinungdan nga gidaro  niini ang daplin sa kalsada ug giharos ang mga biktima.

Daling gidala sa Juan Dosado Memorial Hospital sa lungsod sa Sogod ang mga biktima apan niadtong nakalabay nga gabii gikatahong nakabsan sa kinabuhi si Ornopia.

Sigun pa ni Magdadaro nga sa dihang iya nga nahinabi ang drayber sa delivery van mitug-an kini kaniya nga nakatulog kini sa pagmaneho kay kulang kini sa tulog gumikan kay siya ang gipaihaw sa baka nga ang karne mao ang iyang gihatud sa Bogo.

“Siya man daw gipaihaw sa baka gabii mao to’ng wala siya’y tarong tulog, unya layo baya ang Cebu City ug Bogo. Mga segundos ra daw siya nakapiyong pagmata niya buto na,” sumala pa ni Magdadaro.

Kagahapo’ng adlawa ang pamilya sa namatay ang mipasaka og kaso sa drayber  samtang gipaabot pa kung mopasaka og kaso ang pamilya sa duha ka mga naangol. (Jojo C. Ugdol/EIM)(BANAT NEWS)