Usa patay, 2 angol sa bangga sa motor
CEBU, Philippines – Patay ang 21-anyos nga lalaki human nabangga ang gimaneho’ng motorsiklo sa railing sa dalan sa barangay Talavera, dakbayan sa Toledo.
Giila ang biktima nga si Renein Baribar Layan, 21, taga barangay Poblacion sa maong dakbayan.
Base sa imbestigasyon sa Toledo City Traffic Section nga gikan sa barangay Matab-ang ang biktima sakay sa Honda XRM nga motorsiklo ug paingon na unta mopauli diha’ng kalit nga nawad-an sa kontrol ang biktima samtang kusog ang dagan sa kurbadahon nga bahin hinungdan nga nabangga sa railings.
Nakaangkon og bun-og ug samad sa nagkadaiyang parte sa lawas ang biktima ug dali’ng gidala sa Toledo City Hospital apan nakabsan sa kinabuhi.
Samtang duha ang samdan human nagkabangga ang gimaneho’ng motorsiklo sa sitio Sambag, barangay Magdugo sa maong dakbayan.
Nalambigit sa aksidente sila si Jelie Bendanillo Sepada, 24, minyo nga taga sitio Mohon, barangay Awihao ug si Lindo Trazo Villaver, 21, ulitawo nga taga Lower Pakigne, lungsod sa Minglanilla.
Si Sepada sakay sa Honda Wave nga motor gikan sa Toledo ug paingon sa dakbayan sa Sugbo samtang si Villaver sakay sa Motostar nga motor gikan sa Minglanilla ug paingon sa dakbayan sa Toledo.
Kalit nagkabangga ang duha hinungdan nga nangalagpot ug nakaangkon og samad ug bun-og sa ila’ng lawas.
Gidala sa tambalanan ang mga biktima. – /GMR) (BANAT NEWS)
- Latest
