Radaza wa nahulga sa Team Angel
CEBU, Philippines - Wala nahulga si Lapu-Lapu City Mayor Paz Radaza sa pagpangandam sa partido ni Angel Rodriguez alang sa piniliay sunod tuig.
Ang grupo ni Rodriguez gikatakda nga mopagawas sa ila’ng kompleto’ng line-up sa katapusang bahin ni’ng buwana.
Si Rodriguez kanhi barangay kapitan sa Punta Engaño ug nidagan sa pagka-kongresista sa niaging eleksiyon.
Una’ng nipadayag si Rodriguez sa iya’ng interes nga molansar sa pagka-mayor human sa lubong sa kanhi hepe sa tanod sa Punta Engano nga si Jaime Daño kinsa gipusil patay sa wala mailhi’ng suspek.
Si Rodriguez nagkanayon nga molansar unta si Daño ubos sa "Team Angel" sa pagka-konsehal sa dakbayan.
Si kanhi kongresista Nerissa Soon-Ruiz nibutyag sab nga “99.9%" siya nga molansar sa pagka-kongresista ubos sa Team Angel.
Si Radaza sa iya’ng bahin niingon nga iya’ng pasagdaan nga mopahibalo ang grupo ni Rodriguez sa ila’ng line-up. (BANAT NEWS)
- Latest
