Guwardiya nakalihay sa dunggab

CEBU, Philippines – Grabe ang kahimtang sa construction worker nga maoy naigo sa pagpanunggab sa gikainom nga kauban dihang ang guwardiya nga mao unta ang dunggabon ang nakalihay.

Ang insidente nahitabo alas 2 pasado ang takna sa kadlawon sa construction site sa may P. Basubas Compound, Tipolo, dakbayan sa Mandaue.

Si Senior Police Officer 2 Remegio Arciaga sa Presinto 2 sa Mandaue City Police Office (MCPO) niila sa biktima nga si Reynaldo Milagrosa, 23-anyos, ug ang nakadunggab mao si Jonard Sayson, hingkod, pulos stay-in worker sa  gitukod nila’ng building sa maong dapit.

Matud ni Arciaga nga nag-inom ang biktima ug ang suspek sa tindahan sa gawas sa gitrabaho nila’ng building ug alas 2 na pasado sa kadlawon namauli sa ilang gipuy-an nga bunkhouse nga nahimutang sulod sa compound. Ang guwardiya nga si Rafael Viñas, hingkod, lumad nga taga Negros Oriental ang nibalibad sa pagpasulod sanglit lapas na sa oras nga maoy gilatid sa ilang tagdumala hinungdan sa mainiton nga panaglalis.

Ang suspek nikuha og kutsilyo ug gidunggab si Viñas apan nakaikid ug dungan ang pagtapi sa kutsilyo.

Ang kauban nga construction worker nga nibadlong mao na hinuon ang naigo sa iyang dughan ug uban pa’ng bahin sa iyang lawas hinungdan sa grabe’ng pagkaangol.

Ang suspek nga daw nahuwasan sa kahubog ang dali nga nakapangayo og panabang sa mga kauban nga trabahante sa paghatud sa Vicente Sotto Memorial Medical Center sa biktima.

Dali nga gipusasan sa guwardiya ang suspek. – /GMR) (BANAT NEWS)