Cortes nagpaabot sa bag-ong hepe sa MCPO

CEBU, Philippines - Tinguha ni Mandaue City Mayor Jonas Cortes nga mapadayun ang kampanya batok ilegal nga drugas sa matudlo’ng bag-ong director sa kapolisan sa dakbayan.

Si Mandaue City Police Office Director Petronelli Baldebrin gikatakda na nga hulipan sa Police Regional Office-7.

Apan matud ni Cortes nga hangtud karon wala pa siya kadawat og listahan sa pangan sa mga opisyal sa kapolisan nga iyang pilian nga mamahimo’ng director sa MCPO.

Matud ni Cortes nga kinahanglan gyud mopakita ang kapolisan sa ilang tinud-anay nga kampanya sa pagsumpo sa ilegal nga drugas aron malikayan ang krimen sama sa pagpanulis, pagpamusil ug uban pa.

Si Baldebrin, nadestino sa tungatunga’ng bahin sa tuig 2011, ang nilapas na sa gidugayon sa pagdumala sa MCPO nga molungtad lang unta og duha ka tuig. (Romeo T. Limpangog/GMR)(BANAT NEWS)