Argao PS gipasidunggan sa CPPO

CEBU, Philippines – Naangkon sa kapolisan sa lungsod sa Argao ang tulo ka pasidungog gikan sa Cebu Provincial Police Office.

Ang Argao Police Station ang nag-una sa may labi’ng daghang nasikop nga most wanted persons, labi’ng daghang nasikop sa ilegal nga drugas ug nag-una sab sa kampanya batok ilegal nga sugal sa tuig 2014.

Matud sa hepe sa Argao Police, Sr. Insp. Alejandro Batobalonos, nga ang mao’ng pasidungog ang naghatag kanila og dugang hagit nga hingusgan pa ang ilang kampanya batok sa mga ilegal sa lungsod.

Kini ang una’ng higayun nga nakadawat og tulo ka pasidungog sa managlahi’ng kategoriya ang Argao PS sulod sa usa ka tuig ug unom ka buwan pa nga nahimo’ng hepe si Batobalonos.

Nagpasalamat siya sa iya’ng mga sakop nga wala’y kakapoy nga niserbisyo sa katawhan kinsa kugi nga nipahibawo sa mga nahibaw-ang ilegal ug ang suporta sa lokal nga kagamhanan.

“Dugang hagit ni para namo nga ibalik ug ipakita namo sa among mga labaw ug sa mga tawo diri sa Argao nga insakto ang nadawat namo nga pasidungog,” matud pa ni Batobalonos. – /GMR) (BANAT NEWS)