Marwan kompirmadong patay na
CEBU, Philippines - Gikompirmar nga napatay g’yud sa PNP-Special Action Force ang Malaysian terrorist nga si Zulkifli bin Hir alias Marwan nga gitawag usab nga Osama bin Ladin sa Southeast Asia.
Si Marwan maoy target sa PNP-SAF sa duguong engkwentro niadtong Enero 25 sa Mamasapano, Maguindanao nga miresulta sa kamatayon sa 44 ka polis, dul-an 20 ka Moro Islamic Liberation Front ug wa pa matinong gidaghanon sa habig sa Bangsamoro Islamic Freedom Fighters nga maoy protektor ni Marwan. Sumala pa sa report sa GMA News.tv gikan sa “24- Oras,” usa ka kasaligang tinubdan ang mikompirmar nga ang DNA sample gikan sa giputol nga tudlo ni Marwan nga gipadala ngadto sa Federal Bureau of Investigation (FBI) sa Amerika ni-match sa ilang DNA sample ni Marwan.
Si Marwan adunay P200 milyones o $5 milyones nga patong sa ulo sa Amerika tungod sa mga terror attack nga iyang gihimo nga naglakip sa Bali, Indonesia niadtong 2002.
Giingong bayran si Marwan sa pagtudlo niini paghimo og mga bomba sa mga BIFF. (BANAT NEWS)
- Latest
