COSAP: Drug test sa high school sugdan na
CEBU, Philippines - Sugdan na sa Cebu City Office for Substance Abuse Prevention (COSAP) ang random drug testing sa mga public high schools sa Siyudad sa Sugbo karong Hunyo.
Matud pa ni Dr. Alice Utlang, ang pangulo sa COSAP, miingon nga sa dili pa nila ipatuman ang maong programa, tanang mga ginikanan nga adunay high school nga estudyante, ipailawom una og training ug seminar kun unsaon nila pag-handle ang ilang mga anak nga magpositibo sa drug test.
Kahinumduman nga mitugot ang City Council sa resolusyon nga gipangamahanan ni Konsehal Noel Wenceslao nga i-random drug test ang mga high school nga estudyante.
Matud sa Article 3 section 36 (c) of Republic Act 9165 kon “Comprehensive Dangerous Drugs Act of 2002” nga “students of secondary and tertiary schools shall, pursuant to the related rules and regulations as contained in the school’s student handbook and with notice to the parents, undergo a random drug testing: Provided, that all drug testing expenses whether in public or private schools under this Section will be borne by the government.”
Gibutyag ni Utlang nga adunay lima hangtod sa napulo ka eskuylahan ang gi-prioritize sa COSAP aron maoy unahon sa pag-undergo sa programa.
Apan, midumili siya paghingalan sa maong mga tunghaan tungod mawala ang pulos sa surprise drug testing.
Matud niya nga ang mga estudyante nga magpositibo ipaubos og evaluation kun ikapila na sila nga stage sa paggamit sa ginadiling drugas.
Ang first stage matud pa tungod sa peer pressure, second stage ang occasional nga paggamit, ang third stage drug addiction ug fourth stage ang drug dependency.
Sigon ni Utlang nga ang first ug second stage mamahimong ipaubos sa free outpatient rehabilitation program sa siyudad apan ang third ug fourth stage na nga mga adik, ipa-admit sa rehabilitation center.
Karong Pebrero ipahigayon ang training sa mga ginikanan aron maandam ilang panghunahuna ug emosyon kun unsaon pagdala ilang mga anak. Dili hinuon ipublikar ang pangalan sa eskuylahan ug kadtong mga magpositibo. (BANAT NEWS)
- Latest
