1.8M nagprosisyon
CEBU, Philippines – Bisan pa man sa signal number one nga bagyong Amang miabot og 1.8 milyones ang mitambong sa Solemn Foot Procession alang sa kapistahan sa Senyor Sto. Niño kagahapon.
Sumala pa ni Senior Superintendent Conrad Capa, deputy regional director for operations sa Police Regional Office 7 ug officer-in-charge sa Cebu City Police Office nga hapsay ang procession kagabii.
Apan adunay tulo ka tawo ang gisikop human nagsangyaw samtang nag-procession nga sila si Michael Bradley, 46, taga Florida, USA, iyang asawa nga si Elcel Bradley,28, ug si Rebecca Muñoz, 29.
Sila pasakaan og kasong kalapasan sa Article 132 and 133 sa revised Penal Code o Interruption of Religious Worship and Offending Religious Feelings.
Dako kaayo ang kahingangha ni Capa sa kamalinawon sa mga Sugboanon sa pagprosisyon ug mao pa kini ang unang higayon nga ingon niini kadaghang tawo sa usa ka lugar ug kalihokan nga wala’y kagubot nga nahitabo.
Si Remily Colina, empleyado sa Mandaue City Hall miingon nga sulod na sa unom ka tuig siyang mikuyog sa procession ug pag-ampo niya sa Señor Santo Niño nga malamposon ang iyang operasyon sa iyang kidney.
Si Chief Inspector Enrique Belciña miingon nga alas 3:20 ang ulohan sa procession naabot na sa basilica nga migikan sa ala-una sa hapon.
Naabot ang karosa sa Senyor Sto. Niño alas- 6 na sa gabii nga gisundan og Pontifical Mass ug ang dul-an 20-minutos nga fireworks nga milingaw sa mga debotos ilabi na sa mga bata. (BANAT NEWS)
- Latest
