Pagbisita sa Santo Papa dili makatibhang sa Sinulog

CEBU, Philippines - Dili makatibhang sa kalihukan sa Sinulog ang dungan nga pagbisita sa Santo Papa sa nasud.

Gipasabot sa media liaison officer sa Artsidyosesis sa Sugbo, Msgr. Joseph Tan, nga ang tanan pareho’ng nagmahal sa Santo Papa ug sa balaang bata nga si Señor Sto. Niño.

Nunot niini matud ni Tan nga dili apektado ang bisan unsa’ng kalihukan ug ang buhaton mao nga kun si kinsa ang gusto’ng motan-aw sa Santo Papa moadto ug kadto’ng magpabilin sa Sugbo magpadayun sa debosyon ni Señor Sto. Niño.

 Gihulagway ni Tan ang grandyoso’ng selebrasyon sa Sinulog magpadayun isip tradisyon.

Labot sa hulga sa bagyo, matud ni Tan nga mopagawas sila og final advisory karong Biyernes aron pagsuta kun ang fluvial procession magpadayun ba o dili.

Awhag ni Tan sa tanan nga mag-ampo nga hatagan sa balaang bata og maayong panahon. (BANAT NEWS)