Dul-an P1M drugas sakmit

CEBU, Philippines – Dul-an sa usa ka milyon ka pesos nga kantidad sa cocaine ug shabu nasakmit sa kapolisan ug Bureau of Customs (BOC) kabahin sa hugtanay nga kampanya batok sa ilegal nga drugas.

Ang gibana-bana nga P600 mil nga kantidad sa shabu nasakmit sa kapolisan kagahapon human ang dul-an sa P300 mil nga cocaine nasakmit sa Customs didto sa Mactan Airport. Ang mga sakop sa PNP Regional Special Operations Group mihimo’g buy- bust operation sa Sitio Little Dalaguete, Barangay San Nicolas, dakbayan sa Sugbo.

Nadakpan sa kapolisan si Jonas Trazona, 29, nga usa ka kusinero ug nagpuyo sa maong lugar. Ang hepe sa RSOG nga si Supt. Rex Derilo miingon nga tulo ka semana sila nga naniid ni Trazona.

Matud ni Derilo nga “level 2” drug pusher si Trazona ug makabaligya kini og 100 hangtud 200 gramos nga shabu matag semana.

Gamit ang P500 nga buy-bust money nakapalit ang asset sa kapolisan ug usa ka pakete nga shabu hinungdan nga ilang gisikop ang suspetsado. Nakuha usab sa kapolisan sulod sa balay ni Trazona ang 10 ka dagko nga putos ug 44 ka gagmay nga pakete sa gituohan nga shabu. Si Derilo miingon nga atol ning pagsaulog sa Fiesta Señor gituohan nila nga mosaka ang demanda sa drugas dinhi sa siyudad sa Sugbo.

Ang dinakpan nga si Trazona hugot ‘sab nga mihimakak sa maong pasangil ug matud pa ang drugas igo lang kini nga gibilin kaniya.

Matud ni Trazona dili gayud niya mahimo ang pagbaligya og drugas kay duna man siya’y trabaho.

Apan ang kapolisan mopasaka g’yud og kaso batok ni Trazona tungod sa iyang paglapas sa Republic Act 9165.

Sa laing bahin, pakyas ang pagpayuhot og P250 mil nga kantidad sa Cocaine agi sa Mactan Cebu International Airport (MCIA) nasanta kay ang ilegal nga drugas nga gikan sa Chicago nasakpan sa mga sakop sa Bureau of Customs. Ang drugas gisulod og kahon sa sapatos ug gidala dinhi pinaagi sa private cargo forwarding company. Base sa pasiuna’ng pakisusi sa Philippine Drug Enforcement Agency (PDEA), ilang nasuta nga cocaine g’yud ang mao nga mga powder.

Si Customs Collector Gerardo Campo sa Subport of Mactan miingon nga ang package gipadala sa usa ka Kevin Pillez sa Chicago, USA ug niabot kini sa Mactan niadto’ng Disyembre 11.

Ang kargamento alang kang Jonah Oliverio nga matud pa nagpuyo V. Ranudo Street, dakbayan sa Sugbo.

Si Customs Examiner Roy Gonzaga nahibulong ngano nga may powder man nga naapil sa shoe box nga unta ang sulod niini gideklarar man nga mga sun glasses nga nagkantidad ug 20 US dollar. Si Campo mipaisyu og Warrant of Seizure and Detention (WSD) sa kargamento nga gisulod usab og mga canister dayon ilang gitugyan sa PDEA.

Kay wala man g’yud mipatim-aw ang consignee, gibuksan sa Customs ug PDEA ang canister ug ang mga powder gihimoan og laboratory examination ug nasuta nga kini mga cocaine.

Mitimbang og 57.2 gramos ang cocaine mao nga miabot kini og kapin sa P250 mil sa ‘tag P5 mil ang gramo.

Kun dili mopatim-aw si Oliverio pasakaan siya og kaso sa PDEA ug posible nga iapil ang nagpadala sa mao nga cocaine dinhi sa Sugbo. – /RUB) (BANAT NEWS)