Dos mil ka senior citizen wa mangubra

CEBU, Philippines – Dul-an sa 2,000 ka senior citizens dinhi sa dakbayan sa Sugbo ang wala na usab makakolekta sa ilang ‘tag P3 mil nga cash assistance nga gipanghatag kaniadto’ng Pasko.

Ang kantidad nga wala makolekta miabot og kapin sa P5.3 milyones ug ibalik na kini sa panudlanan sa dakbayan ug dili na ihatag pa niadto’ng wala makakolekta.

Base sa rekord sa Cash and Disbursement Division sa City Treasurer’s Office, miabot og P2.8 milyones ang cash assistance nga wala makolekta gikan sa south district ug P2.5 milyones sa north district. Nakapasamot kini sa pagtuo nga ang mao nga mga senior citizens nga wala makakolekta wala g’yud dinhi sa dakbayan magpuyo ug tua na kini sa lagyo nga mga probinsya.

Si City Treasurer Diwa Cuevas sa sayo pa mipasabut nga ang mga opisyal sa CTO dili makapaabot og dugay sa mao nga mga senior citizens kay ang kuwarta nga wala magamit kinahanglang ibalik g’yud sa General Fund sa dili pa matapos ang tuig. Usa ka senior citizens nga miadto sa City Hall miingon nga didto siya sa Manila atol nga gipanghatag ang cash assistance.

Adunay kapin sa 56 mil ka senior citizens ang narehistro dinhi sa dakbayan ug gitagan-an og cash assistance sa City Hall. Ang kada senior citizen gigahinan og P12 mil sa miaging tuig. Ang nahabilin nga P2 mil sa matag senior citizens gipaabot nga ihatag karong buwana. (BANAT NEWS)