Tulisan gilahos sa MCPO

CEBU, Philippines - Usa ka tulisan nga migamit og toy gun ang diretsong gihatud sa biktima niining taksi sa Mandaue City Police Office (MCPO)  gikan sa Barangay Alang-Alang sa dakbayan sa Mandaue.

Ang nadakpan mao si Gabriel Marie Damaolao Limotan,31, taga Pagsabungan sa maong dakbayan, samtang ang iyang gitulis mao si  Brian Durado Rabago,54, taga Lawaan 1, sa dakbayan sa Talisay.

Matud pa sa imbestigasyon sa Investigation Detection and Management Bureau (IDMB) sa Mandaue City Police Office, misakay ang suspek diha sa Barangay Basak sa maong dakbayan ug nagpahatod sa Barangay Cambaro.

Apan pag-abot sa lugar kalit nga gitionan og “armas” sa suspek si Rabago ug mideklarar og tulis, tungod sa kahadlok gitunol sa drayber ang iyang P300 pa lamang nga kinitaan apan nabantayan niyang toy gun diay ang armas sa suspek.

Tungod niini, gipabulhot og maayo ni Rabago ang taksi bisan giunsa pa siya og hulgang pusilon sa suspek hangtud nga naabot sila sa MCPO ug didto gidakop kini.

Samtang usa ka Koreano nga giilang si IL Lee, ang gipadakop sa drayber sa taksi human kini nag-wild ug giguba ang maong sakyanan diha sa General Maxilom Avenue ning dakbayan sa Sugbo. Usa ka Jobert Andrew Elizalde, 20, taga V. Rama Avenue, Cebu City drayber sa taksing gisakyan sa suspek mireklamo nga gipatid-patiran sa suspek ang iyang taksi ug gilangkat niini ang plastic cover sa sud.

Swerteng dunay beat patrol sa dapit nga nahitaboan nga sila si Police Officer 1 Vincent Caniga ug PO1 Jerome Lendio nga daling miresponde ug misikop sa suspetsado. Nasayran nga nasuko ang suspek kay dugay nakahatag og sukli ang drayber.  (BANAT NEWS)