60 mil nag-penitensiya

CEBU, Philippines - Mokabat sa 60 mil ka mga debotos ang nanguyog sa “Penitential Foot Procession” kagahapon sa kaadlawon ug unang Misa nobenaryo sa Basilica Minore del Sto. Niño isip pormal nga pagsugod sa relihiyosong kalihokan sa pangilin ni Senyor Sto. Niño.

Si Rev. Fr. Jonas Mejares, kinsa maoy rector sa basilica sa iyang homiliya miawhag sa tanan nga magkahiusa sa gasa sa gugma sa Ginoo ug himuong possible ang imposible.

Si Rosalina Jimenez Apostol, 65, lumad nga taga sa Zamboanga City nga mituyo pag-ari sa dakbayan sa Sugbo aron personal nga makasaksi sa kapistahan sa Balaang Bata ug iampo ang iyang special child nga apo kay dako iyang pagtuo nga dunay milagro.

Ang gipangayo ni Apostol mihaom sa homiliya ni Fr. Mejares nga pinaagi sa hugot nga pagtuo mamahimo nga posible ang imposible, mga damgo, pangandoy ug ambisyon.

Samtang si Ofelia Cabase Dasoc, usa ka Person With Disability (PWD) nga deboto ni Señor Santo Niño sulod na sa napulo ka tuig, bisan putol na ang iyang wala nga tiil tungod sa diabetes, wala kini nahimong babag sa pagkuyog sa penitensya tungod sa iyang debosyon.

Usa sa gihimug-atan ni Mejares ang dautang epekto sa bahandi sa paghulagway niini nga ang salapi maayo nga suluguon apan dili maayo nga agalon. Si Senior Superintendent Conrad Capa, officer in charge sa Cebu City Police Office mibanabana nga mokabat sa 60 mil ka tawo ang nanguyog sa prosisyon, dunay tulo ka mga deboto usab ang nakuyapan ug luwas na hinuon ang kahimtang.

Si Capa kinsa mao usab ang Deputy Regional Director for Operations sa Police Regional Office-7 miingon nga aprubado na ang “special gun ban” ug sugod sa adlaw nga Lunes  ilaha na kining ipatuman.

Nianang adlawa usab i-deploy na ang augmentation force nga 861 ka polis gikan sa PRO-7, ingon man ang mga gikan sa ubang polis sa kalungsoran.

Samtang gimando ni Capa kang Sr. Supt. Noel Gillamac, hepe sa kapolisan sa probinsya nga hingusgan ang checkpoints sa mga lugar nga  duol sa Cebu City aron masala ang mga tawong manulod nga posibleng mga badlungon.

Sa laing bahin, hapit na mahurot ang mga tiket sa Sinulog Dance Competition diha sa Cebu City Sports Complex.

Sa unang semana pa lang sa buwan sa Enero daghan na sa mga ticket alang sa grandstand ang nahalin, gani Disyembre pa lang gisugdan na ang online selling niini. Ning tuiga misaka og P200 ang presyo sa tickets.

Gitug-an ni Liza Inez ang in-charge sa pagpamaligya sa mga ticket nga ang mga pink ug green ticket nagkantidad og usa ka libo ka pesos.

Samtang ang yellow P1,500  ug ang blue duol sa mga VIP, P2,500 ug adunay libreng paniudto. (BANAT NEWS)