Mobile treatment sa Manila Water gipadala sa Sugbo
CEBU, Philippines – Nagpadala og mobile water treatment facility ang Manila Water alang sa mga dapit sa habagatang bahin sa Sugbo nga apektado ang suplay sa tubig human sa bagyong Seniang.
Ang Provincial Disaster Risk Reduction Management Office (PDRRMO) miingon nga matubag na ang problema sa tubig nga mainom sa mga lungsod sa Ronda, Dumanjug ug Alcantara.
Ang operator sa mobile water treatment facility, Edilberto Mercado, miingon nga maka-produce sila og 3,500 litros nga limpyong tubig matag oras kun ang tinubdan niini surface water sama sa sapa.
Apan kun brackish o tubig gikan sa dagat, anaa lang sa 1,500 litros matag oras ang ilang ma-produce nga tubig.
Ang kahimanan nga makapahigayun og reverse osmosis procedure alang sa paglimpyo sa tubig ug pag-filter sa hugaw ipundo sa lungsod sa Ronda.
"Magkakaroon tayo ng malinis na tubig kung hindi tayo mauubusan nang chemical, it will take 7 to 10 days pero minsan nagiging 20 days," matud ni Mercado.
Ang pangulo sa PDRRMO, Baltazar Tribunalo, nipahibawo nga aduna na’y duha ka trak nga naghimo og limpyo nga tubig nga anaa sa barangay Ilaya ug Tupas sa lungsod sa Ronda.
"Bisag unsa pa kahugaw sa tubig basta mo-agi sa ilang processing system kini mainom dayun", matud ni Tribunalo. – /GMR) (BANAT NEWS)
- Latest
