Babaye, lalaki suspek sa kawat gidakop
CEBU, Philippines - Nasikop sa mga sakop sa Cebu City Police Office ang duha ka banggiitang kawatan atol sa roving patrol isip kabahin sa pagpangandam sa holiday season.
Ang duha ka suspek mao sila Analyn Salcido, 36-anyos, taga barangay Hipodromo samtang ang iyang kauban mao si Roel Laganso, 34-anyos, taga barangay Villagonzalo II.
Giingong gikan nangawat sa Ayers Lechon House sa barangay Kasambagan ang dinakpan.
Nasakmit sa kamot sa mga suspek ang identification card, Alcatel nga cellphone nga nagkantidad og P5,000 ug pitaka nga may sulod P3,000 ug $70.
Nanagan ang duha ka dinakpan dihang gisita sa kapolisan.
Ang duha gitumbok nga suspek sa pagpangawat sa usa ka kawani sa Bureau of Internal Revenue, tag-iya sa Pony Salon ug kawani sa Thai Boran diin nakuha sa mga CCTV cameras sa maong mga establesemento ang ilang pagpangawat.
Sa pagrikisa sa kapolisan, nakuha ang duha ka paketeng gituohang shabu gikan sa mga suspek. Kasamtangan gitanggong sa selda sa CCPO ang mga dinakpan. (BANAT NEWS)
- Latest
