Balay, classroom gilungkab
CEBU, Philippines - Nahanaw ang mga mahalong alahas, salapi ug uban pa’ng butang sa usa ka panimalay sa Don Pedro, dakbayan sa Bogo nga gisulod sa wala pa hiilhing kawatan alas 10 pasado niadtong Huwebes sa buntag.
Si Police Officer 2 Alexander Ancao Jr. sa Bogo City Police Station miila sa panimalay nga gilungkab nga gipanag-iya ni Felicisimo Mabato Huyo-a, 57-anyos nga biyudo. Matud ni Ancao nga sayo nilakaw paingon sa merkado ang biktima ug wala’y nahibilin sa panimalay.
Sa pagpauli sa biktima, abli na ang ilang pultahan ug guba na ang kandado niini.
Dali nga nakapangayo og panabang sa kapolisan ang biktima ug dihang gisusi ang sulod sa lawak sa panimalay kalit lang ni-ambak sa bintana ang wala hiilhing lalaki ug nidagan paingon sa labong nga katubhan.
Gitabangan pa unta og gukod apan sa pagsuot sa labong nga katubhan wala na nila igkita ang kawatan. Naglakip sa nahanaw ang class ring sa anak sa biktima, laptop ug mga alahas nga naglakip sa kuwentas nga bulawan. Samtang usa ka science classroom sa Basak Community School sa dakbayan sa Sugbo ang nabiktima sa pagpanglungkab sa wala pa mailhing kawatan sa Cabreros Street, Basak-San Nicolas.
Buntag na dihang nabantayan sa usa ka magtutudlo sa maong tunghaan nga abli na ang pultahan sa maong classroom ug ang maestra nga si Jeneth Descartin nga paingon na unta moklase mao na’y nitaho sa Mambaling Police Station.
Nadala sa kawatan ang usa ka DVD player, flat screen TV, laptop ug electric stove nga gisulod sa cabinet.
Matud pa ni PO3 Sean Colobio, desk officer sa Mambaling Police Station, nga pugsanon nga giablihan sa kawatan ang pultahan sa classroom. Duda si Colobio nga dili lang usa ka tawo ang mihimo sa maong krimen gumikan sa kadaghan sa mga gamit nga nakuha. (BANAT NEWS)
- Latest
