Pagbaligya sa karaang Toledo City Hall aprubado na

CEBU, Philippines – Giaprubahan ug giuyonan sa konseho sa dakbayan sa Toledo ang pagbaligya sa luna sa karaang Toledo City hall nga nahimutang atubangan sa dagat sa Barangay Poblacion.

Si Konsehal Antonio Borja Jr. chairman sa committee on properties management and reservation sa siyudad ang miduso og resolusyon pag-aprubar sa pagbaligya sa karaang city hall ug uban pang mga propiyedad nga gipanag-iya sa kagamhanan.

Kini human usab sa paghangyo ni Toledo City Mayor John Henry Osmeña sa konseho aron dunay magamit nga kwarta alang sa mga proyekto sa kalamboan sa maong dakbayan.

Gawas sa city hall ibaligya usab ang luna nga gitukuran sa kanhi city health, city assessor’s office, police headquarters, Bureau of Fire Protection headquarters, Toledo City hotel, Toledo commercial arcade ug travelers inn nga nahimutang usab sa barangay Poblacion.

Ang pag-aprubar niini gibase sa pagtuon sa konseho ug sa legal opinion sa city legal officer nga si Atty. Glenn Cavada.

Aprubado na ang maong resolusyon sa konseho sa ikaduha ug katapusang pagbasa. Tumong sa pagbaligya sa maong propiyedad mao ang pagpanindot ug pagpalambo pa unya sa dakbayan. – /EIM) (BANAT NEWS)