Bisa’g kanselado ang klase, duna gihapoy nagklase

CEBU, Philippines – Nadismaya si Cebu City Mayor Michael Rama human nga dunay mga eskuylahan nga wala motuman sa kamandoan nga nagsuspenso sa klase kagahapon nunot sa Bagyong Ruby.

Ang pagsuspende sa klase gibuhat ni Rama bisan nigawas na sa Sugbo ang bagyo kini aron sa pagpanglimpyo sa mga eskuylahan nga gihimong evacuation centers.

Gawas pa niana, gilikayan ni Rama nga dunay mga estudyanteng madisgrasya tungod sa maong bagyo hangtud nga wala pa kini hingpit nakagawas sa Central Visayas. “Kung adunay madisgrasya ang mayor ra gihapon ang maoy basulon apan dili sila maminaw sa mando sa mayor,” padangat pa ni Rama. Niadto pang Huwebes gikanselar ang mga klase tungod sa pag-abot sa bagyong Ruby.

Apan nasayran nga ang Cebu Doctor’s University ug ang University of the Philippines-Cebu Campus bisan dunay deklarasyon nga way klase wala mosanong niini. Matud pa ni Rama nga dili lang ang lehitimong local order sa Local Government Unit ang gilapas sa maong mga tunghaan kondili hasta ang Administrative Order No. 3 ni Presidente Benigno Aquino niadtong Domingo nga nagmandong walay klase kagahapong adlawa.

Samtang  gipadad-an usab sa Mandaue City Legal Office og suwat ang Cebu Doctors University nga nahimutang sa North Reclamation Area sa Barangay Subangdaku aron paesplikaron kun nganong wala sila motahod sa mando ni Mayor Jonas Cortes nga way klase kagahapon. – /EIM) (BANAT NEWS)