Dul-an 200 mil ang namakwit

CEBU, Philippines - Duna nay nakauli nga mga evacuees ngadto sa ilang tagsatagsa ka mga balay human nga milurang na ang epekto sa bagyong Ruby, apan duna say pipila nga magpaabot pang mahubas ang baha nga nakapalibot sa ilang evacuation centers. Sa lungsod sa San Remigio, 50 ka pamilya ang natanggong sa evacuation center sa Gaway-gaway Elementary School human nga ang karsada sa lugar gisanapan og tubig tungod sa pag-awas sa sapa.

Sa report sa provincial disaster nga miabot ngadto sa 20 feet ang giladmon sa tubig sa karsada ug dili kini maagian. Ang Public Information Officer (PIO) sa Kapitolyo nga si Ethel Natera nagkanayon nga mga 4x4 nga sakyanan lang ang makasugakod sa maong baha.

Si Baltazar Tribunalo, hepe sa Provincial Disaster Risk Reduction and Management Office (PDRRMO) mipadala og mga sakop sa nahisgutang evacuation center. Ang mayor sa lungsod nga si Mariano Martinez nga nahinabi sa Banat News miingon nga wa naabot sa tubig ang evacuation center. Sa laing bahin, ang mga bakwit sa Panugnawan Health Center sa lungsod sa  Medellin mibalhin sa Panugnawan Elementary School human ang atop sa maong health center naguba sa bagyo. 

120,000 namakwit

Subay niini, base usab sa report sa provincial disaster nga sukad kagahapon sa buntag mikabat sa 120,000 ang mga mibakwit sa mga evacuation centers sa nagkalain-laing kalungsuran sa probinsiya. Sa lungsod sa Medellin usa ka 62-anyos ang namatay nga si Amada Tubos, taga Barangay Caputatan, Norte,  apan giklaro ni Tribunalo sakit maoy gikamatyan niini. Sa laing bahin, tulo ka barko sa Philippine Navy ang gikatakdang magdala og relief goods ngadto sa kalungsuran sa amihanang Sugbo nga tabangan sa mga dump trucks sa  Kapitolyo, Central Command, mga negosyante ug uban pa.

Metro Cebu

Gipapauli na ni Cebu City Mayor Michael Rama sa ilang tagsa-tagsa ka mga panimalay ang liboan ka mga namakwit gikan sa coastal barangay samtang ang naa sa kabukiran mag-agad pa sa sitwasyon sa ilang mga lugar. Ang siyudad adunay 137 ka mga evacuation centers nga nagamit atol sa maong bagyo ug 8,000 ka mga food packs ang napanghatag. Sa siyudad sa Talisay, miabot sa 5,542 ka indibidwal ug 1,224 ka pamilya ang mibakwit sa mga evacuation centers apan wa na sila kapugngi  nga namalik sa ilaha human nilurang na ang bagyo. Sa siyudad sa Mandaue, 26,446 ka mga residente sa 25 ka barangay ang namakwit sa mga evacuation centers, apan namauli na usab. Samtang sa pagsuwat ning maong balita, si Lapu-Lapu City Mayor Paz Radaza wala pa momando nga pabalikon ang 14,787 ka evacuees sa 62 ka evacuation centers niini. (BANAT NEWS)