11 kawani sa upat ka munisipyo sa Camotes adik

CEBU, Philippines – Onse ka mga kawani sa gobiyerno sa kalungsuran sa Isla sa Camotes ang positibo sa gipahigayong drug test niadtong Lunes, gilangkuban kini sa mga kawani sa upat ka mga lungsod nga mao ang San Francisco, Poro, Pilar ug Tudela.

Gawas sa maong mga kawani laing lima ang miangkon nga sila tiggamitan g’yud og ginadiling drugas.

Sa lungsod sa San Francisco sa 60 ka kawani sa gobiyerno walo ang positibo sa drug test ug tulo ang miangkon nga sila tiggamitan og ginadiling drugas.

Ang 12 ka mga polis sa nahisgutang lungsod nga gipaubos sa drug test ang parehong negatibo ang resulta.  Sa lungsod sa Poro sa 47 ka mga kawani duha ang positibo ug duha usab ang miangkon nga mga adik.

Ang duha ka nahisgutang kawani nga miangkon wala na lang kini ilakip sa gipahigayong drug test.

Sa lungsod sa Pilar negatibo ang resulta sa drug test sa 67 ka mga kawani diin ang maong gidaghanon gilangkuban kini sa 43 ka casual ug permanent nga kawani ug kapin sa 20 ang job order (JO).

Samtang sa Tudela, 47 nagpa-drug test lakip ang mayor, bise mayor ug tulo ka konsehal, usa kanila ang nagpositibo.

Si Gob. Hilario Davide III nagkanayon nga depende sa mga mayor sa probinsiya kung unsay lakang nga ilang himoon sa mga kawani nga adik.

Giawhag ni Davide ang kalungsoran sa paggahin og pundo sa pagpahigayon og drug test ug kampaniya batok sa ginadiling drugas. – /EIM) (BANAT NEWS)