7.3 linog sa Indonesia, wa magdala og tsunami

CEBU, Philippines - Wala’y natala nga tsunami sa Pilipinas nunot sa 7.3 magnitude nga linog nga nahitabo sa Hadlmahera, Indonesia duol sa Mindanao kagahapon sa buntag. Base sa monitoring sa Philippine Institute of Volcanology and Seismology (Phivolcs) miingon nga wala maapektahi ang maong linog.

Ang Phivolcs, wala makakita og kausaban sa gidak-on sa balod sa Mindanao base sa normal nga sea level. Kini maoy nakuha nga impormasyon sa Davao tide gauge station.

Nagpasabot kini nga wala’y Pacific wide destructive tsunami nga naporma tungod sa maong linog.

Si Ric Mancao, research specialist sa Phivolcs miingon nga di angay mabalaka ang mga Filipino kay way tsunami nga  maabot dinhi, base usab kini sa Pacific Tsunami Warning Center (PTWC).

Apan ang PTWC sa America miingon nga tungod kay  duol lang ang Pilipinas sa epicenter sa maong linog, nasulod kini sa 300 ka kilometro nga radius, makabatyag kini og dagkong pagbalod, labaw og .03 metros sa gidak-on niini kun taob ang dagat. (BANAT NEWS)