5 positibo sa drugas, CADAC may bahad

CEBU, Philippines – Ipatangtang ni Mayor Michael Rama ang lima ka empleyado sa City Hall nga sakop sa Department of Public Services nga nasakpang tiggamitan og ilegal nga drugas human nagpositibo sa gipahigayong drug test sa Cebu City Health Office.

Ang drug test gihimo niadtong Nobiyembre 4 ug 5 kabahin  gihapon sa pagtimaan sa Drug Awareness Month sa siyudad sa Sugbo.

Dugang pa ni Rama nga dili na siya modawat pa og  mga rason sa mga empleyado nga nalambigit sa drugas.

Samtang si Dr. Alice Utlang, hepe sa City Office for Substance Abuse Prevention (COSAP) miingon nga ang lima dili na maka-renew sa ilang trabaho.

Sa kinatibuk-an 191 na ka barangay workers ug 15 ka city hall employees ang nasakpang adik.

Kagahapong adlawa gilusad ang “Drug Abuse Prevention and Control Week” nga gipaagi sa motorkada nga gikuyogan sa mga city officials, kapolisan, LGU officials, COSAP, PDEA-7 ug uban pa.

Apan nasagmuyo si Atty. Paul Clarence Oaminal, ang presiding officer sa Cebu Anti-Drug Abuse Council (CADAC)  tungod kay gamay ra nga barangay officials ang mikuyog aron pagpakita og suporta kontra illegal drugs.

Karong Nobiyembre 15, dunay “March for Drug Free Cebu” ug mao kini ang adlaw nga gihatag ni Oaminal aron motambong ang mga wala moduyog sa motorkada kagahapon.

Kadtong dili g’yud motambong, pabutangan ni Oaminal ang ilang mga barangay halls og tarpaulin nga dunay nakasuwat nga “Our Barangay Support Drug Lords”ug iyaha usab kining ipatik sa Facebook.

Matud niya, pito ngadto sa walo lang ka barangay ang kanunay motambong sa maong kalihokan, nagtuo siyang maikog ang mga kapitan sa mga drug lords nga ilang mga “kompare.”

Si Adlaon Barangay Kapitan Nieves Narra kinsa maoy nirepresentar sa Association of Barangay Councils diha sa CADAC miingon nga napadalhan og memorandum ang tanang barangay nga patambungon sa maong motorkada. – /EIM) (BANAT NEWS)