Napriso pa apan suspek gihapon

CEBU, Philippines - Nagtingkagol pa sa bilanggoan ang usa ka kanhi polis samtang gipasanginlang suspek sa sunod-sunod nga tulis sa dakbayan sa Sugbo.

Sa rekord sa Misamis Occidental Provincial Reformatory Jail (MOPRJ) , nasuta nga napriso pa si PO3 Eugene Salingay samtang may commitment order usab ang korte nga gipetsahan og Septiyembre 8, 2014.

Si SPO4 Eurestes Dugso sa Oroquita City Police mitug-an nga ila gisusi sa MOPRJ human gikataho nga kini suspek sa mga tulis sa Sugbo ug ilang nasuta nga nabilanggo gyud si Salingay.

Gani ilang gihangyo ang jail warden ug ang abogado ni Salingay nga kini kuhaan og hulagway uban ang usa ka newspaper nga dunay petsa nga Septiyembre 6, 2014, adlaw nga ilang gisubay sa MOPRJ.

“Nagpamatuod lang gyud ni sir nga naa ra gyud diri si Salingay. Ambot nganong naapil iyang ngalan diha sa tulis, mihilak pa man gani to iyang igsuon pag-adto namo, amo lang gipasabot nga kuhaan namo siya og picture kay naapil na pud iyang ngalan sa Cebu nga tulis bisan og priso na siya,” sigun pa ni Dugso.

Samtang ang deputy chief for administration sa Cebu City Police Office (CCPO), Supt. Alet Virtucio, miingon nga bisan pa man sa maong kalamboan, magpadayun ang ilang imbestigasyon sa kalambigitan ni Salingay sa mga tulis sa dakbayan. Usa sa ilang plano ang pagkuha og mga forensic evidences sama sa finger prints gikan sa mga nahitaboan sa pagpanulis.

Gipasabot ni Virtucio nga wala sila namasangil nga gipagawas si Salingay aron makatulis apan gusto lang niini nga masayran kung unsa ka tinuod ang mga pamahayag nga si Salingay gyud ang ilang nakita nga usa sa mga mitulis kanila.

Matud ni Virtucio nga nindot nga atangan kung magkatakdo ang finger prints ni Salingay sa mga nahitaboan sa tulis kay segurado gyud nga dunay manubag. (Jojo C. Ugdol/GMR)(BANAT NEWS)