Mahuyang nangawat sa halad nadakpan
CEBU, Philippines- Nadakpan sa akto ang mahuyang nga nangawat og kuwarta sulod sa donation box sa simbahan sa San Vicente Ferrer Parish Church sa dakbayan sa Bogo alas 8 pasado sa niaging Martes sa gabii.
Si PO2 Alexander Ancao Jr. sa Bogo City Police Station miila sa nadakpan nga si Edgar Balonan Masong, 22-anyos, kinsa nigamit og gamay nga lipak sa kawayan nga ang tumoy adunay gibutang nga papilit. Matud ni Ancao nga unang namatikdan sa mga pari ang pagsulod sa suspek nga miagi sa bintana ug gikuha ang kuwarta sulod sa donation box pinaagi sa pagtuslok sa gamay nga lipak.
Mopilit ang papel nga kuwarta sa tumoy sa lipak sa matag bira paingon sa gawas.
Dali nga nangayo og panabang ang mga pari sa mga barangay tanod ug kapolisan.
Si Ancao miingon nga nakita sa mga polis ug mga barangay tanod nga matag bira sa suspek sa gituslok sa gingi sa donation box madala sab ang mga papel nga kuwarta nga mopilit sa tumoy sa maong lipak nga may papilit.
Dihang nasikop ang suspek, nasuta nga mokabat na sa P560 nga kuwarta ang iyang nakuha.
Gitug-an ni Ancao nga si Masong makadaghan na nila madakpi nga mangawat sa sulod sa simbahan apan makagawas kay maghilak-hilak man atubangan sa pari uban ang pagpangayo og pasaylo. (BANAT NEWS)
- Latest
