Tuway-tuway sa tawo

CEBU, Philippines -  “Sagrado ang bukog sa tawo ug dili maayong kuhaon kini sa hilom sa tuyo nga himuong anting- ating,” pamahayag kini ni Cesar  Ybañez Jr. nga taga Tugbongan, Consolacion.

Matud pa niya ilaha kining leksyon nga nakat-onan tungod sa  gidangatan sa ilang uyoan nga matud pa niya sekretong mikuha sa tuway-tuway sa ilang papa nga namatay.

Giingong nahitabo ang pagkuha sa tuway-tuway niadtong  gihabwa ang bukog sa ilang amahan nga gilubong sa sam-ang sa Barangay Guizo, Dakbayan sa Mandaue.

Gibalhin nila kini sa sam-ang sa Sitio Carahay, Barangay Gun-ob, Dakbayan sa Lapu-Lapu aron tipunon sa mga bukog sa nangamatay na nilang apohan. Usa ang ilang uyoan nga si Tiyo Erning nga igsoon sa ilang amahan nga nagpuyo sa Lapu-Lapu  ang mikuyog sa paghabwa.

Apan sa paglabay sa pipila ka adlaw, miduaw sa ilang balay ang ilang uyoan nga nanglawom na ang mga mata.

Dihang ilang gisukit-sukit unsay nahitabo kaniya, kini mitug-an nga gihasi siya sa kalag sa ilang amahan nga iyang igsuon.

“Wala man gud ko magpahibalo ninyo nga akong gikuha ang bukog sa tuway-tuway sa inyong papa,” pamahayag sa ilang uyoan.

Gipakita niini kanila ang maong mga bukog nga daw “1972 nga piso” ang gilapdon nga giputos og itom nga panapton.

“Dunay nakasulti nako nga maayong anting-anting kining tuway-tuway sa tawo mao nga ako ning gihilom pagkuha,” dugang pasabot kanila sa ilang uyoan.

Apan wala kini magtuo nga ikasuko kadto sa kalag sa iyang igsuon kay kanunay kini hamukon niini ug dili pakatulgon.

Matud pa sigehan siya og hunghong niini dalang kasuko nga iuli ang iyang bukog sa oras sa tungang gabii apan nahadlok siya pagtuman niini.

“Mao diay nga nagpahibalo nako ang akong uyoan, kay magpakuyog man pag-uli sa mga bukog,” sumala pa ni Jun.

Usa ka sepulturero ang ilang giduol ug gitabangan sila niini pag-uli sa maong mga bukog, ug matud pa sukad niadto makatulog na og balik ang iyang uyoan.(Romeo T. Limpangog/EIM)(BANAT NEWS)