Abellanosa vs Carillo sa 2016
CEBU, Philippines - Wala mahadlok si Kongresista Rodrigo “Bebot” Abellanosa nga atbangan siya ni Konsehal Gerardo Carillo sa eleksiyon unya sa 2016.
Si Carillo maoy gipahibalo ni Mayor Michael Rama nga kandidato pagka-kongresista ubos sa Team Rama sa Cebu City South District atbang ni Abellanosa.
Kauban sila si Abellanosa ug Carillo sa konseho sa dakbayan kaniadto ug pulos sakop sa Bando Osmeña Pundok Kauswagan (BOPK) apan si Carillo mibuwag ug miipon na sa Team Rama.
Matud ni Abellanosa nga nasabtan niya ang tumong ni Carillo sa pag-ipon sa Team Rama tungod kay anaa na man siya sa katapusang termino pagkakonsehal ug dili na makadagan sa 2016 elections.
Si Abellanosa miingon nga si Carillo dili man kahatagan og puwesto sa BOPK tungod kay siya magpapili man pag-usab pagka kongresista sa south district.
Gitug-anan ni Carillo ang mga reporters nga nagsugod na gani siya pagsuroy-suroy sa kabarangayan aron pagkuha sa pulso sa katawhan.
Gipasidan-an ni Abellanosa si Carillo kay matud niya si Rama usahay kusog kaayo mopalaum nga siya kuhaon nga kandidato, sama sa gihimo niini sa mga kapitan sa barangay apan kun duol na ang eleksyon dili na niya tumanon ang mga saad. (BANAT NEWS)
- Latest
