Gasolinahan gitulis,van salesmen gitulis ‘sab

CEBU, Philippines – Gitulis sa duha ka wala mailhing lalaki ang Petron Gasoline Station sa Barangay Labogon, Dakbayan sa Mandaue ug gidis-armahan pa ang guwardiya sa miaging tungang gabii.

Si Senior Police Officer 2 Gregorio Cabizares sa kapolisan sa Presinto 3 sa Mandaue City Police Office (MCPO) miingon nga ang guwardiya sa maong gasolinahan nga si Mozart Onario, 30, maoy mitawag kanila bahin sa nahitabo.

Giingong kalit lang gitionan og armas sa duha ka wala hiilhing lalaki nga nagsakay og motorsiklo si Onario ug gikuha gikan kaniya ang issue nga kalibre .38.

Human niini ang laing kauban nga lalaki miduol ngadto sa cashier nga si Samboy Lungtad, 20, ug gikuha ang halin nga P16,000 sa kaha.

Gidala usab sa tulisan ang knapsack sa biktima ug cellphone niini dayong sakay og balik sa ilang motorsiklo ug mipabulhot og padagan pahilayo paingon sa lungsod sa Consolacion.

Gisubay karon kung dunay nakuha nga video footage ang Close Circuit Television (CCTV) camera sa nahisgotang gasolinahan alang sa pag-ila sa armadong mga lalaki nga nagtulis     niini.

Samtang, kapin sa P40 mil ang nasakiyo sa tulo ka tulisan sa mga kawani sa Tanduay Distillers Inc. pasado alas 5:00 sa miaging hapon sa Barangay Dakit sa dakbayan sa Bogo.

Ang mga biktima naila nga sila si Ulysses Seville, 57, salesman; Junrey Laping, 21, driver ug si  Tomasito Sena, 45, truck helper.

Padulong na mosulod sa ilang bodega  ang van   dihang gibabagan sila  sa mga tulisan ug gikuha ang kapin sa P40 mil nga halin, cellphone, bag, ug pitaka ni Bejoc nga may sulod nga P1,800.

Human niini, gipaslak sa sulod sa van ang tulo ug gisirad-an. Wa na diha ang mga tulisan pag-abot sa mga polis. – /EIM) (BANAT NEWS)