Tinubdan sa tubig sa Guadalupe may kagaw
CEBU, Philippines – Gibutyag sa Regional Epidemiology Surveillance Unit (RESU-7) nga unom sa siyam ka sampol sa tubig nga ilang gikuha sa Sitio Tugasan ug Sandayong sa Barangay Guadalupe siyudad sa Sugbo ang nagpositibo sa kagaw nga fecal coli form.
Matud sa pangulo sa RESU-7 Renan Cimafranca nagpasabot kini nga kontaminado ug dili haom imnon ang maong tubig.
Gipasabot ni Cimafranca nga way gihimong monitoring ug wala’y sanitary ug business permit ang maong mga tinubdan sa tubig sa maong lugar.
Asoy ni Cimafranca nga kun magnegosyo og tubig kinahanglan g’yud dunay chlorine kon treated ang tubig ug regular ang pag-inspeksyon sa kalimpyo sa tubig.
Gitataw hinoon sa opisyal nga dili kinahanglan nga pasirad-an ang usa ka water station tungod kay mosamot ang problema sa kakulangon sa tubig sa maong dapit. Gisugyot ni Cimafranca nga palamboon pa unta sa maong dapit ang sanitary toilets ug kinahanglan nga magbaton g’yud ang matag panimay niini.
Base sa records sa RESU-7 ang Guadalupe ikaupat sa mga barangay nga dunay kaso sa tipos, usa niini ang namatay ug pito ang naangol. -/EIM) (BANAT NEWS)
- Latest
