Drug Bust

CEBU, Philippines - Ubay-ubay nga mga drug personalities ang nasikop sa otoridad sa managlahing operasyon sa Metro Cebu nga miresulta sa pagkasakmit sa mga drugas ug mga armas.

Nagtingkagol na karon sa bilanggoan sa Pardo Police ang usa ka gidudahang level 3 drug pusher sa Sitio Cabangkalan, Bulacao sa dakbayan Sugbo human nadakpan kagahapon sa buntag.

Ang nasikop mao si Moises Tagacanao, 35, nagpuyo sa maong lugar. Apil sa gidakop ang iyang ugangan nga si Dulce Sabejon, 68, ug ang iyang asawa nga si Gestica Tagacanao,31.

Matud pa ni SPO2 Bestilio Dabatos sa Pardo Police nga nahinabi sa Banat News nga dugay na nilang gi-surveillance si Moises tungod sa report nga namaligya kini og drugas.

Ang hepe sa Pardo Police nga si Senior Inspector Alexis Relado maoy nangulo sa maong operasyon dala ang search warrant nga giisyu ni RTC Judge Gilbert Moises.

Nakuha sa kapulisan sulod sa balay ni Moises ang duha ka medium size nga putos sa shabu, usa ka Batangas knife ug drug paraphernalia.

Level 2

Samtang wala makaipsot ang usa ka level 2 drug pusher sa Barangay Mantuyong, sa dakbayan sa Mandaue  sa gihimong  buy-bust operation kagahapon sa kaadlawon.

Ang nadakpan mao si Lindsey Mendoza, 35, taga Barangay Tayud sa lungsod sa Liloan. Matud sa pangulo sa Police Station 1 Chief Inspector Jimmy Aguisanda gihimo ang buy-bust operation sa Sitio Asinan. Matud ni Aguisanda daghan nang mga silingan ni Mendoza nga misumbong  tungod sa pagpamaligya og drugas nga nakompirmar nila sa intelligence report.

Nakuha gikan sa suspek ang pito ka gagmay'ng pakete,  tulo ka medium size nga paketeng pulos dunay sud nga gidudahang shabu nga gibanabanang mokantidad og kapin P100mil, usa ka .45 kalibre nga armas ug P300.

Giingong ang iyang area of operation naglakip usab sa Liloan ug Compostela.

Ang suspek sa iyang bahin, miingon nga bag-o pa lang siya sa maong illegal nga kalihukan tungod kay wala siya mapakaon sa iyang pamilya.

Jeepney driver

Sa dakbayan sa Lapu-Lapu , nadakpan ang usa ka jeepney driver human nakuhaan og 20 ka mga gagmay’ng pakete sa ginadiling drugas ug usa ka .38 nga rebolber ug mga bala, drug paraphernalia ug ang P200 nga marked money diha sa Mahusay Compound, Sitio Malingin, Barangay Punta Engaño sa miaging Lunes sa gabii.

Matud ni Police Senior Inspector Virnino Serale, hepe sa Lapu-Lapu City Police Office- Station 2 ang nadakpan mao si Erwin Costura, 32, nga usa ka level 3 drug pusher. Ang mga suspek pasakaan og kasong paglapas sa Republic Act 9165 o Comprehensive Dangerous Drug Act of 2002.

PDEA operation

Samtang usa ka notadong tigpahuyot og drugas sa Barangay Calamba, Cebu City ang nakaikyas gikan sa mga sakop sa Philippine Drugs Enforcement Agency (PDEA) 7, kagahapon sa buntag.

Ang nakaikyas naila nga si Bevencio Baldisamo, nagpuyo sa maong lugar, ang PDEA armado og search warrant batok sa suspek apan ang manghod na lang niini ang naabtan sa mga operatiba ug mao’y gibasahan sa search warrant nga giisyu ni RTC Judge Soliver Peras.

Nakuha sa kapulisan ang duha ka medium size sa drugas ug listahan sa gidudahang nakautang og drugas kang Baldisamo gikan sa balay sa       suspek.

Matud pa ni Mark Maramba, operations officer sa PDEA-7 nga usa ka bulan nilang gipanid-an si Baldisamo nga base sa impormasyong ilang natigom makabaligya kini og kinse gramos nga shabu kada semana.

Dunay cabinet nga nakit-an ang mga operatiba nga dunay daghang mga pitaka, mga ID’s, mga tablets nga gituohang giprenda sa mga adik.

Ang bag-ong direktor sa Police Regional Office-7 nga si Chief Superintendent Prudencio Tom Bañas  daan nang nanganti nga puohon niya ang  mga drug personalities dinhi sa rehiyon. (BANAT NEWS)