‘Half Rice’ himuong balaud
CEBU, Philippines – Nagtinguha ang konseho sa dakbayan sa Sugbo nga kinahanglang ang tanang kan-anan mo-serve og “half rice” alang sa pagdaginot sa bugas.
Base sa ordinansahon nga giduso ni Konsehal Mary Ann de los Santos iyang gitumbok ang pagtuon sa Food and Nutrition Research Institute diin matag Filipino duna kini usik nga duha ka kutsarang kan-on nga mokabat ngadto sa 9 gramos nga bugas matag kaon. Sa tuig 2010, mikabat ngadto sa 13 porsiyento ang nausik nga imported nga bugas diin mikabat ngadto sa P6.2 bilyones ang tugbang nga presyo nga makonsumo sa 2.6 milyones ka Pilipino matag tuig.
Tumong sa ordinansahon maseguro ang pagdaginot sa bugas ug mag-edukar usab sa konsumedor sa dili pag-usik-usik sa bugas.
Ang ordinansahon nag-awhag sa tanang establesamento nga nagbaligya og pagkaon ug nag-serve og kan-on nga ilakip sa ilang menu ang “half rice serving”.
Ang molapas sa maong balaud sa unang kalapasan adunay verbal ug written warning, sa ikaduha mao ang P1,500 nga multa, P3,000 sa ikatulo, P4,000 sa ika-upat ug pagsuspenso sa permit to operate/business permit ug P5,000 nga multa matag buwan sa wala pagtuman sa balaud sa ikalimang kalapasan.
Kasamtangang gihiklin una sa konseho ang pagtuki sa ordinansahon alang sa paghipos og dugang impormasyon ug ang City Health Department gilakip sa monitoring niini. -/GMR) (BANAT NEWS)
- Latest
