Mga armadong tawo nanghasi sa Boljoon

CEBU, Philippines - Nibakwit ang 18 ka molupyo sa Barangay Nangka sa Boljoon ngadto sa lungsod sa Alegria ug Malabuyoc human gikatahong gihasi sila og mga armadong tawo.

Si Inspector Dexter Basergo, hepe sa Boljoon, nga nahinabi sa Banat News miingon nga 18 ka tawo ang mibakwit  ngadto sa ilang silingan nga lungsod tungod sa kahadlok. Sumala pa ni Basergo nga dihang iyang gipasusi sa iyang mga sakop ang Barangay Nangka wala nay nahibiling tawo sa pipila ka mga balay didto.

Gituohan ni Basergo nga dunay kalambigitan ang maong kagubot sa krimen nga nahitabo sa Barangay Nug-as sa lungsod sa Alcoy sa miaging semana.

Nasayran ni Basergo nga kaliwat sa mga namakwit ang biktima sa maong krimen ug giingong sila na ‘sab ang gibalikan sa mga kriminal. Dugang ni Basergo nga giatangan ang mga molupyo sa mga armadong tawo aron dili maka-report sa kapolisan.

Si Senior Inspector Ronilo Macasilhig, hepe sa Alegria nga nahinabi sa Banat News miingon nga ang maong mga tawo midangop sa ilang mga paryente sa maong lungsod.

Tungod niini, ang kapolisan sa Boljoon mihimo na og imbestigasyon kabahin sa maong mga armadong tawo samtang gihatud sa mga polis sa Alegria ang mga namakwit padung sa Boljoon aron makuhaan og mga pamahayag. (BANAT NEWS)