P1M Shabu ‘Sakmit
CEBU, Philippines – Dul-an sa usa ka milyon ka pesos nga kantidad sa drugas ang nasakmit sa kapulisan sa dakbayan sa Sugbo, human sa duha ka buy-bust operation sa managlahing dapit ang gihimo sa City Intelligence Branch (CIB) ug City Anti- Illegal Drugs Special Operation Task Force (CAIDSOTF).
Pasado alas 7, Huwebes sa gabii, nasikop sa CIB ang usa ka level 1 drug pusher sa Sitio Sampaguita, Villagonzalo II, Tejero nga si Philip Montesclaros, 32.
Ang deputy chief sa CIB nga si Inspector Gomersendo Mandawe nga nahinabi sa Banat News nagkanayon nga dunay mi-text kanila kalabot sa ilegal nga kalihokan ni Montesclaros. Human sa usa ka semanang surveillance gihimo dayon ang buy bust operation nga miresulta sa pagkasakmit sa 15 ka medium size ka paketeng shabu nga mitimbang og 75 gramos nga mokantidad sa P855 mil.
Samtang ang CAIDSOTF, mironda ‘sab sa duha ka mga drug dens sa Sitio Sto. Niño, Barangay Luz kagahapon sa buntag nga miresulta sa pagkasikop sa siyam ka tawo lakip ang target nga level 2 drug pusher.
Sumala pa ni Senior Inspector Eunil Avergonzado, hepe sa CAIDSOTF nga duha ka team ang gimugna human nga duha ka drug den ang gi-operate sa target nga si Ramil Misterio,44. Human nga nagpositibo sa buy- bust operation ang maong dapit, ila gilayon nga gisulod sa kapulisan ang duha ka nagtupad nga balay nga gihimong drug den.
Nangatanggong sa ikaduhang andana sa duha ka balay ang mga suspek ug nagtapon-tapon agi sa bintana ug mga atop apan nadakpan sila sa mga polis. Sa usa ka drug den pito ka mga tawo ang nasipong sa CAIDSOTF ug Special Weapons and Tactics (SWAT) Team.
Giila ang pito nga sila si Victor Granada, Joe Jen Carrido, Eddie Quirante, Alfie Sabas, Alfredo Gutierez, Divina Guana ug usa ka 17- anyos lalaki.
Samtang sa tapad nga drug den sikop sab ang subject sa kapulisan nga sila si Ramil Misterio ug ang kauban niini nga si Fritz Callalero ug nakuhaan sila og duha ka medium packs nga shabu ug usa ka.38 revolver, “pugakhang” , usa ka putos sa marijuana ug mga buak nga ampoules sa nubain. - /EIM (BANAT NEWS)
- Latest
