Gas station sa Minglanilla gitulis

CEBU, Philippines - Laing gasoline station ang gitulis niadtong Huwebes sa gabii sa Poblacion Ward 3, Minglanilla.

Gibana-banang kapin sa P33 mil ang nakuha sa Petron Gas Station sa mga tulisan nga sakay og motorsiklo.

Matud ni PO2 Nikki Carlo Plarisan sa Minglanilla Police Station nga moabot sa unom ka mga tulisan ang miatake sa maong gas station nga sakay sa tulo ka motorsiklo.

Ang guwardiya sa maong establisemento nga si Ruben Cruz nga taga Lower Calajoan, Minglanilla nga konektado sa Golden Sun Security Agency ang wala na’y nahimo ug nadis-armahan sa mga tulisan human kini gitionan og armas sa duha ka tulisan ug gikuha ang iyang .38 revolver nga service firearm.

Samtang ang cashier nga si Epefanio Sellote, 43, ang igo na lang usab mihatag sa kuwarta human gisulod sa duha ka tulisan.

Sumala pa ni Plarisan nga paingon na unta nga manirado ang mga trabahante sa maong gas station dihang kalit miabot ang unom ka tulisan nga pulos nagsuot og helmet dayon deklarar og tulis. Duha ka tawo ang nagsilbing lookout, duha ang mition sa guwardiya ug duha ang misulod ug mikuha sa kuwarta.

Human sa pagpanulis dali usab misibat ang tulo ka motorsiklo paingon sa habagatan.

Gisubay karon sa kapolisan kung duna ba’y close circuit television camera (CCTV) ang maong establisemento aron pagsubay sa posibleng pag-ila sa mga tulisan. (/GMR)(BANAT NEWS)