Accredited NGOs sa Cebu City mikunhod

CEBU, Philippines - Gidaghanon sa non-government organization (NGO) sa dakbayan sa Sugbo mikunhod kon itandi sa milabay’ng tuig tungod sa pag-estrikto na sa siyudad sa mga rekisitos una pa sila hatagan og akreditasyon.

Si Konsehal Sisinio Andales, chairman sa accreditation committee nagkanayon nga karong tuiga 32 lang ka NGO ang gi-accredit sa siyudad itandi sa 70 sa milabay’ng tuig.

Gipasabot ni Andales nga buot likayan sa siyudad nga dunay mga bogus nga NGO sama sa isyu kang Janet Lim-Napoles kinsa nalambigit sa pork barrel scam.

Si Napoles gipasanginlang naghimo og mga bogus nga NGOs aron didto ipaagi ang mga pork barrel sa mga senador ug kongresista mao kintahay ang moimplimentar  sa hinimo-himong mga proyekto.

Matud ni Andales nga usa sa mga rekisitos sa NGO nga mo-apply sa siyudad bag-o o renewal mao ang “certification of good funding” gikan sa Security and Exchange Commission (SEC).

Si Andales nagkanayon nga buot lang masiguro sa siyudad nga ang mga NGO nga ilang gi-accredit mga “genuine.”

Ang siyudad dunay P10 milyones nga budget nga bahin-bahinon alang sa financial assistance sa NGO ug peoples organizations matag tuig.

Dili molapas sa P500 mil nga assistance o ipa-loan sa siyudad ngadto sa NGO nga mangayo og pinansiyal nga tabang.

Matud usab ni Andales nga kung ang accredited NGO sa siyudad modugang og pangayo og pinansiyal nga hinabang kinahanglan nga duna kini “certification” gikan sa city treasurer’s office nga ang maong unang financial assistance sa maong NGO na-liquidate na kini.

Ug kung wala pa kini ma-liquidate ang siyudad dili mo-release og laing pinansiyal nga hinabang. (BANAT NEWS)