Nanagpa napriso, nakuhaa’g drugas, armas

CEBU, Philippines - Lalaki nga gireklamo sa iyang live-in partner tungod kay nanapat ug nagpabuto og armas napriso ug nakuhaan pa gyud og daghang drugas sa lungsod sa Consolacion. Ang nasikop naila nga si Angelo Lapaz, 36, taga Sitio Laray, barangay Jugan sa maong lungsod.

Ang mireklamo naila nga si Charito Macabihag, 32, molupyo sa nahisgutang lugar.

Base sa imbestigasyon sa kapolisan nga mireklamo ang babaye tungod kay gisagpa sa suspek ang nawong ug mikuha pa gyud og armas ug nagpabuto sulod sa ilang balay.

Daling mirespondi ang kapolisan ug nakit-an pa gyud sa akto ang suspek nga nagbitbit pa sa iyang kalibre .38 nga revolver sa gawas sa iyang balay.

Dihang nakabantay ang suspetsado, dali kining midagan sulod sa balay. Gisundan sa kapolisan ang suspek ug nasikop sulod sa ilang panimalay.

Narekober sa kapolisan ang armas nga gikuptan sa suspek sa iyang tuong kamot nga may duha ka bala ug duha ka kabhang.

Dihang girekisa ang suspetsado nakuha gikan kaniya ang usa ka gamay nga pakete nga gituohang shabu ug mga drug paraphernalia.

Daling gidala sa kapolisan ang suspek ug kasamtangang gitanggong sa karsel sa maong lungsod samtang giandam pa ang kaso batok kaniya. (BANAT NEWS)