Palma nanawagan og pag-ampo sa gubat sa Israel ug Iran

CEBU, Philippines — Simbahang Katoliko, nanawagan og pag ampo alang sa kalinaw taliwala sa nagpadayong gubat karon sa Israel ug Iran diin nanginlabot na usab ang Amerika.

Si Cebu Archbishop Jose Palma nanghinaut nga magtinabangay ang isig katawo tibuok nasud sa hiniusang pag ampo aron maangkon na ang kalinaw nga dugay nang gipangandoy.

Dugang pa ni Palma, dako ang iyang paglaum nga makab-ot sa maong mga nasud ang kalinaw.  

Dili giyera maoy makasulbad sa problema kundili mahinungdanong pakig-isturya ang gikinahanglan sa usag-usa, suma pa sa arsobispo.

Samtang karon pa lang nityabaw na ang mga yanong tawo sa epekto sa gubat nga gikahadlokang mo grabe pa.

Ang gubat sa Middle East layo ra apan gibati og kahadlok ang pipila ka mga Sugbuanon sa epekto niini sa panginabuhian.

Usa sa manindahay ug bingka sa daplin sa dalan nityabaw human misaka ang mga sagol sa iyang lutoonon sama sa kamay ug uban pa ug dako iyang pagtuo nga ang padayon nga pagsaka sa presyo sa lana resulta sa gubat sa tunga-tungang sidlakan kun Middle East. (BANAT NEWS)