Initiative batok pork makabalda sa umaabot eleksiyon

CEBU, Philippines- Makabalda sa pagpangandam sa umaabot eleksiyon ang pasiugdahang People’s Initiative tumong sa hingpit nga pagwagtang sa pork barrel system.

Kini ang gipadayag ni Provincial Election Supervisor,  Atty. Lionel Marco Castillano isip reaksiyon sa panawagan ni Arsobispo Jose Palma sa katawhan nga suportahan ang People’s Congress. Matud ni Castillano nga magkinahanglan og igong panahon ug dugang gahin nga pundo alang sa pag-verify sa mga pirma sa mga botante nga mopirma sa naasoy’ng Peoples Initiative.

Kinahanglan ang 10 porsiyento sa tanang rehistradong botante tibuok nasud ug tres porsiyento matag distrito ang i-verify nga pirma.

Giangkon ni Castillano nga maglisud gani ang Commission on Elections sa pag-verify sa pirma sa pipila ka mga election recall petition.

Gawas niini makuhaan usab ang budget sa Comelec.  Hinuon si Castillano miingon nga kinahanglang dili maabtan sunod tuig kon idayun gyud ang People’s Initiative sanglit adunay eleksiyon sa Sangguniang Kabataan sa 2015 samtang mangandam na usab sila sa 2016 national ug local elections.

Giklaro ni Castillano nga gawas nga taas ang proseso nga agian sa maong mga lakang, ubang rekord sa ilang buhatan  anaa pa sa korte ug sa electoral tribunal nunot sa mga protesta sa niaging eleksiyon. - /GMR) (BANAT NEWS)