Usa ka kawani sa konsehal adik

CEBU, Philippines -  Usa ka kawani gikan sa 17 ka mga buhatan sa mga konsehal sa Cebu City ang napositibo sa random drug testing nga gihimo sa City Office on Substance Abuse Prevention (COSAP) kagahapon.

Wala hinuon ibutyag ni COSAP head Dr. Alice Utlang kung kang kinsa nga konsehal nasakop ang maong empleyado.

Matud ni Utlang nga 31 lang ka mga kawani gikan sa tanang buhatan sa konsehal ang gipaubos sa random drug test, kini maoy hinungdan kun nganong wala niya ibutyag kung kang kinsa nga konsehal ang maong kawani nagtrabaho.

Hinuon, bisan pa niini gikalipay ni Utlang ang resulta sa drug test tungod kay nakatabang ang ilang gihimong information drive labot sa illegal nga drugas.

Gidugang sa COSAP nga dul-an na sa 500 ka mga empleyado sa city hall ang napaubos sa drug test ug siyam niini ang nagpositibo nga pulos casual ug job order employees nga gitangtang ug mi-resign sa trabaho subay na usab sa kamanduan ni Mayor Michael Rama.

Sa laing bahin, negatibo ang 25 sa 50 ka kawani sa barangay sa Sudlon 2 atol sa gihimong susamang drug test sa miaging adlaw nga Miyerkules.

Sumala pa nga sa 50 ka mga barangay workers, 25 lang ang gipaubos sa drug test subay sa gipatawag ni barangay kapitan Winefredo Macario.

Ang kapitan miingon nga salig siya sa iyang mga kawani nga walay tiggamitan kanila apan aron makasiguro iyang gipatawag ang mga loader ug tanod aron ipaubos  sa surprise drug test.

Nasayran nga sagad sa mga kawani gikan sa 54 ka mga barangay nga napaubos na sa drug test mga loaders ug tanod. (/EIM)(BANAT NEWS)