Tag-iya’g lotto outlet gitulis
CEBU, Philippines - Gitulis sa duha ka lalaking sakay sa motorsiklo ang usa ka tag-iya og lotto outlet sa dakbayan sa Mandaue niadtong Biyernes sa gabii.
Si PO3 Heraclio Gamboa sa kapolisan sa Presinto 3 sa Mandaue City Police Office (MCPO) miila sa biktima nga si Fabian Medina, 57- anyos, taga Fatima Valley, Pagsabungan sa maong dakbayan.
Gikan nanira sa iyang lotto outlet ang biktima nga nahimutang sa highway sa maong dakbayan ug dala ang natigum nga kwarta.
Matud ni Gamboa nga naandan sa biktima nga mohapit og sud-an sa mga tindahan gikan manirado sa lotto outlet.
Samtang naglakaw pauli sa ilang panimaye, usa ka motorsiklo nga may sakay duha ka tawo ang mihunong ug mition og wala matino nga kalibre sa armas ngadto sa biktima ug mideklarar og tulis.
Wala makalihok ang biktima dihang gikuha sa tulisan ang bag nga gisudlan sa P12,000 nga kwarta.
Matud ni Gamboa nga wala pa gyud mokontento gidaginot pa gyud sa mga tulisan ang pitaka sa biktima nga adunay sulod P300, mahalong cellphone ug ubang importanteng ID niini. Ang mga tulisan daling nisakay sa ilang motorsiklo pahilayo sa maong lugar. (BANAT NEWS)
- Latest
