Kolorum nga mga traysikol sa Mandaue dakpon

CEBU, Philippines- Gisugdan na niadtong Lunes sa Traffic Enforcement Agency of Mandaue (TEAM) ang pagdakop sa wala’y prangkisa nga mga traysikol nga namasahero sa dakbayan sa Mandaue.

Si Edwin Ermac, operation chief sa TEAM, miingon nga kapin sa 7,000 ka mga traysikol ang nagdagan sa dakbayan apan ilang nasuta nga kapin sa 5,000 ang kolorum.

Giklaro ni Ermac nga dili maglisud ang mga traffic enforcers sa pag-ila sa legal nga pasaheroan nga mga traysikol tungod kay giplastada man sa pagbutang sa side car ang ilang business plate ug body number.

Ang wala’y business plate ug body number nga mga traysikol nga namasahero ilang gikonsiderar nga kolorum ug ilegal ang pagpasakay og pasahero.

Matud ni Ermac 2,000 lang ka traysikol ang gitugotan sa kagamhanan sa dakbayan nga makapamasahero.

Sa unang gabii sa ilang operasyon, nadakpan ang 14 ka traysikol nga wala’y prangkisa ug gidala sa impounding area sa ilang buhatan.

Si Ermac miingon nga adlaw ug gabii ang operasyon batok sa mga wala’y prangkisa nga mga traysikol.

Giila nga daghang kolorum nga mga traysikol nga nagdagan sa panahon sa gabii ang mga barangay Subangdaku, Labogon, Umapad, Basak, Paknaan, Maguikay, Cabancalan ug Casuntingan. - /GMR) (BANAT NEWS)